Ezr 3 | NdeIBE | STEP | Kwathi sekufika inyanga yesikhombisa, lapho abako-Israyeli sebehlezi emizini yakibo, abantu babuthana njengomuntu munye eJerusalema.

Ezra 3

Ukwakhiwa Kutsha kwe-Alithare

1 Kwathi sekufika inyanga yesikhombisa, lapho abako-Israyeli sebehlezi emizini yakibo, abantu babuthana njengomuntu munye eJerusalema.

2 Kwasekusithi uJeshuwa indodana kaJozadaki labaphristi ayesebenza labo kanye loZerubhabheli indodana kaShilithiyeli labakhula bakhe baqalisa ukwakha i-alithare likaNkulunkulu ka-Israyeli ukwenza umhlatshelo womnikelo wokutshiswa kulo, mayelana lalokho okulotshiweyo eMthethweni kaMosi umuntu kaNkulunkulu. 3 Lokuba babesesaba abantu bendawo, balakha i-alithare esisekelweni salo benza imihlatshelo yokutshiswa kuJehova kulo, yomibili imihlatshelo yokusa lowokuhlwa. 4 Kwathi njalo belandela okulotshiweyo bawugubha uMkhosi weZihonqo besenza inani elifaneleyo leminikelo yokutshiswa elungiselwe lelo lalelo ilanga. 5 Ngemuva kwalokho baletha iminikelo yenjayelo eyokutshiswa, imihlatshelo yokuThwasa kwe-Nyanga lemihlatshelo yayo yonke imikhosi kaJehova emisiweyo engcwele, kanye laleyo eyayilethwa njengeminikelo yokuzizwela eyalethwa kuJehova.

6 Ngelanga lokuqala lenyanga yesikhombisa baqalisa ukuletha iminikelo yokutshiswa kuJehova, lokuba isisekelo sethempeli likaJehova sasingakabekwa.

Ukwakhiwa Kutsha kweThempeli

7 Basebesipha ababazi bamatshe lababazi nje imali, bapha ukudla lokunathwayo lamafutha ebantwini baseThire leSidoni, ukuze balethe izigodo zemisidari ngendlela yolwandle kusuka eLebhanoni kusiya eJopha njengoba kwakuvunyelwe nguKhurosi inkosi yasePhesiya.

8 Ngenyanga yesibili ngomnyaka wesibili bebuyile endlini kaNkulunkulu eJerusalema, uZerubhabheli indodana kaShilithiyeli, loJeshuwa indodana kaJozadaki labo bonke abafowabo (abaphristi labaLevi labo bonke ababuyayo eJerusalema bevela ebugqilini) bawuqalisa umsebenzi, bakhetha abaLevi abaleminyaka engamatshumi amabili kusiya phezulu ukuthi baphathe umsebenzi wokwakha indlu kaJehova. 9 UJeshuwa lamadodana akhe labafowabo loKhadimiyeli lamadodana akhe (abazukulu bakaHodaviya) lamadodana kaHenadadi kanye lamadodana abo labafowabo – bonke bengabaLevi – bahlangana ndawonye ukukhangela labo ababesebenza endlini kaNkulunkulu.

10 Kwathi abakhi sebesibekile isisekelo sethempeli likaJehova abaphristi bagqoka izingubo zabo, baphatha amachacho, kanye labaLevi (amadodana ka-Asafi) bephethe izigubhu, bonke bema ezindaweni zabo ukudumisa uJehova njengokwamiswa nguDavida inkosi yako-Israyeli. 11 Badumisa bebonga, bahlabelela uJehova bathi: “Ulungile; uthando lwakhe ku-Israyeli lumi laphakade.” Bonke abantu bamemeza bedumisa uJehova ngokuba isisekelo sendlu kaJehova sasesibekiwe. 12 Kodwa abanengi babaphristi abadala labaLevi kanye lezikhulu zezimuli ababelibonile ithempeli lakuqala, bakhala baphumisela bebona isisekelo saleli ithempeli sibekwa, ikanti abanye babo bamemeza ngokuthaba. 13 Kakho owayengawehlukanisa umsindo wokumemeza kokuthokoza lomsindo wokukhala ngokuba abantu benza umsindo omangalisayo. Njalo umsindo lowo wezwakala kude.